భరణికంలో చెరువులో భారీ మంటలు

-రసాయన వ్యర్థాల వల్లే అంటున్న స్థానికులు
పరవాడ,  ఫిబ్రవరి ౧౦(చైతన్యవారధి): మండలంలో భరణికం పెదచెరువులో ఆదివారం సాయంత్రం పెద్ద మొత్తంలో మంటలు ఎగసిపడి పడ్డాయి. శ్మశనవాటిక సమీపంలో తానాం వెళ్లే రహదారిని ఆనుకుని మంటలతో నల్లని పొగలు కమ్ముకున్నాయి. దీన్ని గమనించిన స్థానికులు ఏం ప్రమాదం జరిగిందోనని ఆందోళనకు గురై పరుగులు తీశారు. కొన్ని రోజులుగా రసాయన వ్యర్థ ద్రావణాన్ని గుర్తుతెలియని వ్యక్తులు
లారీలపై పెద్ద మొత్తంలో తీసుకొచ్చి ఇక్కడి ముళ్లపొదల్లో వేస్తున్నారు. ఆదివారం అటుగా వెళ్లే వారు సిగరెట్‌ కాల్చి పడేయడంతో మంటలు చెలరేగాయి. పరిసర ప్రాంతాలను దట్టమైన నల్లటి పొగ కమ్మేసింది. పక్కనే ఉన్న హెచ్‌.టి విద్యుత్తు స్తంభాన్ని మంటలు తాకడంతో స్థానికులు హడలి పోయారు. వెంటనే అనకాపల్లి, రాంకీ ఫార్మాసిటీ అగ్ని మాపక కేంద్రాలకు సమాచారం అందించారు. వారు వచ్చి గంటపాటు శ్రమించినా మంటలు అదుపుకాలేదు. చివరకు నురగను ఉపయోగించి మంటలను అదుపు చేశారు. సమీపంలో గల కంపెనీలకు చెందిన రసాయన వ్యర్థాలను పారవేయడంవల్ల ఈ పరిస్థితి వచ్చిందని స్థానికులు మండిపడుతున్నారు. సంబంధిత అధికారులు స్పందించి దీనిపై విచారణ చేసి పర్యావరణానికి హాని కల్గించిన బాధ్యులపై చర్యలు తీసుకోవాలని కోరుతున్నారు.