వుడా పార్కులో మత ప్రచారాలు

విశాఖపట్నం, జనవరి 20: వుడా పార్కు వేదికగా మత ప్రచారాలు సాగుతున్నాయి. దీంతో ఆహ్లాదం కోసం వచ్చిన సందర్శకులు ఇబ్బంది పడుతున్నారు. కొంతమంది మత ప్రబోధకులు ఆదివారం సమావేశాలు నిర్వహించారు. పార్కు సిబ్బందిగానీ, వుడా అధికారులు కానీ ఈ విషయాన్ని పట్టించుకోలేదు. సుమారు 300 మంది వరకు
మతప్రబోధకులు, వారి అనుచరులు హేండ్‌ మైక్‌ ద్వారా మత సిద్దాంతాలు ప్రచారం చేయడంతో పార్కుకి వచ్చిన సందర్శకులు ఇబ్బంది పడ్డారు. కొందరు సందర్శకులు పార్కు సిబ్బందికి ఫిర్యాదు చేసినా తమకేమీ తెలియనట్లు వారు వ్యవహరించారు. ఇదే సమయంలో ఇతర ప్రాంతాల నుంచి వచ్చిన పాఠశాల విద్యార్థులు పార్కులో భోజనం చేస్తామంటే సిబ్బంది అడ్డుకున్నారు. దీంతో వారంతా రహదారిపైనే భోజనాలు చేయాల్సి వచ్చింది. మత ప్రచారం చేస్తున్న వారిని మాత్రం పార్కులోనే భోజనాలకు అనుమతించారు. దీని ఆంతర్యమేమిటని కొందరు సందర్శకులు సిబ్బందిని ప్రశ్నించినప్పటికీ ఫలితం లేకపోయింది. కొంత మంది వుడా సిబ్బంది ప్రమేయంతోనే వారిని పార్కులో భోజనాలకు అనుమతించినట్లు సమాచారం. ప్రశాంతత కోసం పార్కుకి వస్తామని, ఇక్కడ కూడా ఇలా ఇబ్బంది పడాల్సి వస్తోందని సందర్శకులు అసంతృప్తి వ్యక్తంచేశారు.