చంద్రుడిని ఢీకొట్టనున్న జంట ఉపగ్రహాలు

కేప్‌ కెనావెరాల్‌: చంద్రుడి చుట్టూ పరిభ్రమిస్తున్న జంట ఉపగ్రహాలను వచ్చే వారం జాబిల్లి ఉపరితలంతో ఢీ కొట్టించాలని అమెరికా అంతరిక్ష పరిశోధన సంస్థ (నాసా) భావిస్తోంది. ఏడాది పాటు విజయవంతంగా సేవలు అందించిన ఈ గ్రావిటీ రికవరీ అండ్‌ ఇంటీరియర్‌ లేబొరేటరీ (గ్రెయిల్‌)కి చెందిన ఈ రెండు ఉపగ్రహాలు చందమామ
ఉపరితలం కింద ఏముందో తెలుసుకునేందుకు ప్రయోగించారు. వీటిని చంద్రుడి ఉత్తర ధ్రువం వద్ద ఉన్న పర్వతాన్ని ఢీ కొట్టించాలని నిర్ణయించారు. లోగడ నిర్వహించిన అపోలో యాత్రలకు సంబంధించిన గుర్తులు చెరిగిపోకుండా చూసేలా ఈ ప్రాంతాన్ని ఎంపిక చేసుకున్నారు. ఉపగ్రహాలు ఢీ కొట్టే పరిణామం భూమిపై నుంచి కనిపించదు. భారత కాలమానం ప్రకారం.. మంగళవారం తెల్లవారుజామున 3.58 గంటలకు ఇది చోటుచేసుకుంటుంది. రెండు ఉపగ్రహాలు 20 సెకన్ల తేడాతో జాబిల్లిని తాకుతాయి. గంటకు 6,120 కిలోమీటర్ల వేగంతో అవి ఢీ కొడతాయి. అ సందర్భంగా అవి పూర్తిగా ధ్వంసమవుతాయని గ్రెయిల్‌ ప్రాజెక్టు మేనేజర్‌ డేవిడ్‌ లేమన్‌ పేర్కొన్నారు.