భక్తులకుఇబ్బంది లేకుండా ఏర్పాట్లు

విశాఖపట్నం, చైతన్యవారధి: మార్గశిర మాసోత్సవాలు సందర్భంగా ఆర్టీసీ సహాయంతో మొదటి, రెండు గురువారాల్లో రెండేసి చొప్పున, 3, 4 గురువారాల్లో నాలుగు చొప్పున ఉచితంగా బస్సులను నడపనున్నట్లు శ్రీ కనకమహాలక్ష్మి ఆలయ కార్యనిర్వహణ అధికారిణి డి.భ్రమరాంబ తెలిపారు. శనివారం ఆమె విలేకర్లతో
మాట్లాడుతూ.. గతేడాది కంటే ఈసారి భక్తులు అధికంగా అమ్మవారిని దర్శించేందుకు వస్తారని, 16 లక్షల మంది భక్తులు రావొచ్చని అంచనా వేస్తున్నామన్నారు. భక్తులకు ఎక్కడా ఇబ్బంది లేకుండా అన్ని ఏర్పాట్లు చేశామన్నారు. రూ.20, రూ.100, రూ.200 టిక్కెట్లతో పాటు వి.ఐ.పి. దర్శనాలు, ధర్మ దర్శనాలకు ప్రత్యేకంగా క్యూలైన్లు ఏర్పాటు చేశామని చెప్పారు. వి.ఐ.పి. దర్శనాలు సాయంత్రం 4 గంటల వరకు మాత్రమే అనుమతిస్తామన్నారు. వృద్ధులు, వికలాంగుల ప్రత్యేక దర్శనాలకు పాసులు ఇస్తున్నట్లు చెప్పారు. గతేడాది రూ.2 కోట్ల ఆదాయం సమకూరిందని, ఈ సారి రూ.2.50 కోట్లు ఆదాయం వచ్చే అవకాశం ఉందన్నారు. 200 మంది పోలీసులతో బందోబస్తు, వివిధ ఆలయాలకు చెందిన 150 మంది సిబ్బంది, సేవాదళ సభ్యులతో పర్యవేక్షణ ఉంటుందన్నారు. సమావేశంలో సహాయ కార్యనిర్వహణ అధికారులు రాంబాబు, గోపీచంద్‌, డీఈ వెంకటరమణ, తదితరులు పాల్గొన్నారు.