ముగిసిన మార్గశిర మాసోత్సవాలు

విశాఖపట్నం, చైతన్యవారధి: కనకమహలక్ష్మి అమ్మవారి మార్గశిర మాసోత్సవాలు మంగళవారంతో ఘనంగా ముగిశాయి. డిసెంబరు 6 నుంచి ఉత్సవాలు ప్రారంభమైన ఉత్సవాలు మార్గశిర బహుళ అమావాస్యతో ముగిశాయి. మంగళవారం అమ్మవారి ఆలయంలో సహస్ర దీపాలంకరణ సేవ నిర్వహించారు.

ఆలయ అనివేటి మండపంలో వెయ్యి దీపాలను వెలిగించారు. ఓంకార రూపం చుట్టూ మూడు వరుసల్లోప్రమిదలను వెలిగించారు. దేవస్థానం ఈవో డి.భ్రమరాంబ ఆధ్వర్యంలో ఈ సేవ జరిగింది. సాయంత్రం 7 గంటల ప్రాంతంలో దీపాలను వెలిగించారు. ట్రస్టీలు కన్నబాబు, రాంగోపాల్‌, ఆలయ అధికారులు పాల్గొన్నారు. పలువురు భక్తులు వచ్చి దీపాలను వెలిగించారు. మంగళవారం భక్తుల హాజరు పల్చగా కనిపించింది. అమ్మవారు కనకమహలక్ష్మి అవతారంలో దర్శనమిచ్చారు. ఇంతవరకు ఈ ఏడాది రూ.1.45 కోట్ల ఆదాయం వచ్చిందని ఈవో భ్రమరాంబ తెలిపారు. ఇంకా హుండీలను లెక్కించాల్సి ఉందని, ఈ ఆదాయం కలిపితే మరింతగా పెరిగే అవకాశాలున్నాయన్నారు. గత ఏడాది నెలరోజులకు రూ.1.25 కోట్లు ఆదాయం వస్తే ఈసారి బాగా పెరిగిందన్నారు. ఉత్సవాలు ప్రశాంతంగా ముగియడంతో యంత్రాంగం ఊపిరి పీల్చుకుంది.