నల్లధనాన్ని వెనక్కి తెప్పించాలి: అద్వానీ

న్యూఢిల్లీ, డిసెంబర్ 27: మనదేశానికి చెందిన చాలామంది విదేశాల్లో నల్లధనాన్ని దాచుకోవడం పట్ల బి.జె.పి అగ్రనేత ఎల్.కె.అద్వానీ ఆందోళన వ్యక్తం చేశారు. ఈ నల్లధనాన్ని భారత్‌కు తెప్పించేందుకు సుప్రీంకోర్టు సమర్థవంతమైన పాత్రను పోషించగలదనే ఆశాభావాన్ని ఆయన వ్యక్తం చేశారు.

నల్లధనం వెలికితీతపై సీనియర్ న్యాయవాది రాంజెఠ్మలానీ, సుభాష్ కశ్యప్, కె.పి.ఎస్.గిల్ వంటి ఐదుగురు ప్రముఖులు ‘సుప్రీం’లో వేసిన రిట్ పిటిషన్ పెండింగ్‌లో ఉన్న విషయాన్ని ఆయన ప్రస్తావించారు. విదేశాల్లో పేరుకుపోయిన నల్లధనాన్ని వెనక్కి రప్పించేందుకు ప్రభుత్వంపై వత్తిడి తేవడమే ఈ పిటిషన్ ముఖ్య ఉద్దేశ్యమని అద్వానీ తాను సోమవారం రాసిన ఒక బ్లాగులో పేర్కొన్నారు. అవినీతికి దారితీసిన 2జి స్పెక్ట్రమ్ కేటాయింపులు, కామన్ వెల్త్ క్రీడలు, ఆదర్శ్ హౌసింగ్ సొసైటీ కుంభకోణం వంటి అంశాలను ఈ సందర్భంగా అద్వానీ ప్రస్తావించారు. అవినీతికి వ్యతిరేకంగా చురుకుగా వ్యవహరిస్తున్నందుకు సుప్రీంకోర్టు, పార్లమెంటు, కంప్ట్రోలర్ అండ్ ఆడిటర్ జనరల్‌కు క్రెడిట్ దక్కుతుందని పేర్కొన్నారు.