రంగు మారిన ధాన్యం కొనుగోలుకు కృషి

ఏలూరు: రంగు మారిన ధాన్యాన్ని కొనుగోలు చేసేందుకు కృషి చేస్తున్నామని, భారత ఆహార సంస్థ ఆదేశాలతో పనిలేకుండా వరదల్లో నష్టపోయిన ధాన్యోత్పత్తులను సేకరించి రైతులను అన్ని విధాల ఆదుకుంటామని రాష్ట్ర వ్యవసాయ శాఖ మంత్రి వైఎస్‌ వివేకానంద రెడ్డి, పౌరసరఫరాల శాఖ మంత్రి శ్రీధర్‌బాబు, సాంఘిక సంక్షేమ శాఖ మంత్రి పితాని సత్యనారాయణలు పేర్కొన్నారు.

పశ్చిమగోదావరి జిల్లాలో అధిక వర్షాలకు నష్టపోయిన ప్రాంతాలను పరిశీలించేందుకు వచ్చిన మంత్రులు ఏలూరులో విలేకర్ల సమావేశంలో మాట్లాడారు. ఖరీఫ్‌ చివరి కాలంలో వర్షాలకు నష్టపోయిన రైతులకు రుణాలపై వడ్డీ రూ. 35 కోట్లు మాఫీ వర్తింపజేస్తున్నామని మంత్రులు పేర్కొన్నారు. కౌలు రైతులు ఆదుకునే విషయమే ఇప్పుడు ప్రభుత్వం ముందున్న ప్రధాన సమస్యని దీనిపై గత మూడేళ్ల నుంచి అన్ని విధాల చర్చ సాగుతుందని పేర్కొన్నారు. అధికంగా నష్టపోయిన కౌలు రైతుకు రాయితీలు, వడ్డీ మాఫీలు, రుణాలు వంటివి వర్తింపజేయడానికి కృషి జరుగుతుందని అన్నారు.