జగన్‌ను తిరిగి పార్టీలో తీసుకునేందుకు ఒత్తిడి

అనకాపల్లి, డిసెంబరు 6 (చైతన్యవారధి):  వై.ఎస్‌.జగన్‌ను తిరిగి పార్టీలో తీసుకునే విధంగా అధిష్టానంపై ఒత్తిడి తీసుకువద్దామని మాజీమంత్రి కొణతాల రామకృష్ణ కాంగ్రెస్ నేతలకు కార్యకక్తలకు చెబుతున్నారు.  స్థానిక న్యూకాలనీలో గల క్యాంప్‌ కార్యాలయంలో నియోజకవర్గాల వారీగా ముఖ్యనేతలతో సమీక్షలు నిర్వహిస్తున్నారు. దీనిలో భాగంగా సోమవారం పెందుర్తి, అనకాపల్లి నియోజకవర్గాలకుకు చెందిన ముఖ్యులతో ఆయన సమావేశమైయ్యారు. ఈ సందర్భంగా కొణతాల మాట్లాడుతూ వై.ఎస్‌.జగన్‌ను తిరిగి పార్టీలో తీసుకునే విధంగా అధిష్టానంపై ఒత్తిడి తీసుకువద్దామన్నారు.

సరైన శాఖలు కేటాయించలేదని పలువురు మంత్రులు అసంతృప్తి వ్యక్తం చేస్తే అధిష్ఠానం రంగంలో దిగి వారిని బుజ్జగించారన్నారు. జిల్లాలో జగన్‌ నిర్వహించే ఓదార్పు యాత్రలో పాల్గొందామన్నారు. స్వంత పార్టీ నేతలను విడిచిపెట్టి ఇతర పార్టీలపై ఆధారపడడం సరి కాదని పేర్కొన్నారు. ఈ సందర్భంగా పలువురు నేతలు తమ అభిప్రాయాలు వ్యక్తం చేశారు. మీరు ఏ నిర్ణయం తీసుకున్నా దానికి కట్టుబడి ఉంటామని పలువురు కాంగ్రెస్‌ నేతలు మాజీమంత్రి కొణతాల రామకృష్ణకు స్పష్టం చేశారు. ఆలోచించి సరైన నిర్ణయం తీసుకోవాలని కొందరు సూచించారు. జగన్‌ వెంట వెళ్లడమే సరైందని మరి కొందరు పేర్కొన్నారు. ఈ కార్యక్రమంలో డి.సి.ఎం.ఎస్‌ ఛైర్మన్‌ డి.యు.వి.గోపాలరాజు, మాజీ ఎమ్మెల్యే గండి బాబ్జి, వర్తక సంఘం అధ్యక్షులు కొణతాల పెదబాబు, అనకాపల్లి నియోజకవర్గం అధికార ప్రతినిధి కొణతాల బాబురావు, పురపాలక సంఘం మాజీ ఛైర్మన్‌ కడిమిశెట్టి రాంజీ, మలసాల కిషోర్‌ తదితరులు పాల్గొన్నారు.