బలగాల మొహరింపుతో అపోహలు వద్దు: హోం మంత్రి

హైదరాబాద్‌: బలగాల మొహరింపు వల్ల ఎవరూ ఎలాంటి అపోహలు పెట్టుకోవద్దని హోం మంత్రి సబిత కోరారు. ఆమె మీడియాతో మాట్లాడారు. ఏడాది నుంచి జరిగిన సంఘటనలు దృష్టిలో ఉంచుకునే ప్రభుత్వం చర్యలు తీసుకుంటుందని చెప్పారు. ఉద్యమాలను అణచివేయాలని, ఇబ్బంది పెట్టాలన్న ఆలోచన

ప్రభుత్వానికి లేదన్నారు. కేవలం శాంతి భద్రతలు కాపాడాలన్న ఉద్దేశంతోనే అదనపు బలగాలు కోరామని వివరించారు. బలగాల మొహరింపు అన్ని ప్రాంతాల్లోనూ ఉందన్నారు. ఒకే ప్రాంతానికి పరిమితం చేయలేదని తెలిపారు. ఇది సమస్యాత్మక ప్రాంతాల్లో కొంత ఎక్కువ ఉందని స్పష్టం చేశారు. శాంతి భద్రతల పరిరక్షణకు అన్ని వర్గాలు సహకరించాలని పిలుపునిచ్చారు. శ్రీకృష్ణ కమిటీ నివేదిక ఎలా ఉన్నా శాంతియుత వాతావరణానికి ప్రతి ఒక్కరూ సహకరించాలని కోరారు. ఉగ్రవాద, తీవ్రవాద కార్యాకలాపాలపైనా పోలీసు శాఖ దృష్టి సారించాల్సి ఉంటుందని తెలిపారు. రాష్ట్రంలో ప్రశాంతత నెలకొనేందుకు తీసుకునే చర్యల గురించి ముఖ్యమంత్రి సమీక్షించారని వివరించారు.