ఢిల్లీ చేరుకున్న రష్యా అధ్యక్షుడు

న్యూఢిల్లీ: భారత్‌లో రెండు రోజుల పర్యటన నిమిత్తం రష్యా అధ్యక్షుడు దిమిత్రి మెద్వెదేవ్‌ ఈ ఉదయం న్యూఢిల్లీ చేరుకున్నారు. కీలకమైన రక్షణ, పౌర అణు ఇంధన సహకారం, అంతరిక్షం, ఆర్థిక అంశాలపై ఈ పర్యటన సందర్భంగా ఇరు దేశాలు పలు ఒప్పందాలను కుదుర్చుకొనే అవకాశం ఉంది. సుమారు 15 ఒప్పందాలు ఖరారు కావచ్చు.

రష్యా అధ్యక్షుడు మెద్వెదేవ్‌ మంగళవారం ప్రధాని మన్మోహన్‌సింగ్‌తో సమావేశం కానున్నారు. ద్వైపాక్షిక అంశాలు, ఆఫ్గానిస్థాన్‌, పాకిస్థాన్‌లో పరిస్థితులు, ఇతర ప్రాంతీయ వ్యవహారాలు, అంతర్జాతీయ వ్యవహారాలపై ఇరువురు నేతలు చర్చించనున్నారు. మెద్వెదేవ్‌ బుధవారం ఆగ్రాలోని తాజ్‌మహల్‌ను సందర్శించనున్నారు. అనంతరం ఆయన ముంబయి వెళ్లనున్నారు. 26/11 ఉగ్రవాద దాడిలో మృతి చెందిన వారికి నివాళులర్పించనున్నారు. హిందీ చిత్ర పరిశ్రమకు గురించి మరిన్ని విషయాలు తెలుసుకునేందుకు అక్కడి ఫిల్మ్‌ సిటీకి వెళ్లనున్నారు.