మత్స్యకారులకు అండగా భాజపా: గడ్కరీ

విశాఖపట్నం(చైతన్యవారధి): మత్స్యకారుల సమస్యలు పరిష్కరించే వరకూ భారతీయ జనతా పార్టీ పోరాడుతుందని ఆ పార్టీ జాతీయ అధ్యక్షుడు నితిన్‌ గడ్కరీ అన్నారు. విశాఖలో జరుగుతున్న తూర్పు తీర ప్రాంత మత్స్యకార జాతీయ సదస్సులో ఆయన పాల్గొన్నారు. ఈ సదస్సులో మత్స్యకార సమస్యలపై ముసాయిదా రూపొందించామని, దీన్ని కేంద్ర ప్రభుత్వ దృష్టికి తీసుకువెళ్లామన్నారు. తమిళనాడు మత్స్యకారులకు శ్రీలంక నుంచి ఇబ్బందులు ఎదురవుతున్నాయని దీనిపైనా చర్చిస్తామని వివరించారు.

ప్రభుత్వం పట్టించుకోకపోవడం వల్లమత్స్యకారులకు జాతీయ బ్యాంకులు రుణాలు ఇవ్వడం లేదని ఆరోపించారు. సముద్ర ఉత్పత్తులకు సరైన మార్కెటింగ్‌ సదుపాయం లేకపోవడం వల్ల దళారీ వ్యవస్థతో దోపిడీకి గురవుతున్నారని ఆందోళన వ్యక్తం చేశారు. పోర్టులు, సెజ్‌ల పేరిట భూసేకరణతో మత్స్యకారుల జీవనం దుర్భరంగా మారిన విషయాన్ని ప్రభుత్వ దృష్టికి తీసుకువెళ్లామన్నారు. ఈ సదస్సులో విశాఖ, పశ్చిమ బెంగాల్‌, ఒరిస్సా, తమిళనాడు రాష్ట్రాల నుంచి మత్స్యకారులు పాల్గొన్నారు.