అనుమతి లేకుండా విగ్రహాల ఏర్పాటు తగదు

నర్సీపట్నం, నవంబర్ 21(చైతన్యవారధి): పంచాయతీ అనుమతి లేకుండా కొత్తవీధిలో ఇందిరమ్మ విగ్రహం ఏర్పాటు సరికాదని సర్పంచ్ చింతకాయల సన్యాసిపాత్రుడు అన్నారు. ఆయన తన స్వగృహంలో విలేకరుల సమావేశం నిర్వహించారు. ఈ సందర్భంగా ఆయన మాట్లాడుతూ, కాంగ్రెస్‌పార్టీ నాయకులు వారి ఇష్టారాజ్యంగా పట్టణంలో దేశ నాయకుల విగ్రహాలు ఏర్పాటుచేస్తున్నారన్నారు. ఎవరైనా విగ్రహాలు ఏర్పాటుచేయాలనుకుంటే పంచాయతీ అనుమతి విధిగా పొందాలన్నారు. కొత్తవీధిలో ఇందిరమ్మ విగ్రహం ఏర్పాటు వల్ల జరిగిన వివాదం దృష్ట్యా ఆయన ఈ వ్యాఖ్యలు చేశారు. పట్టణంలో చాలా చోట్ల రోడ్లపై విగ్రహాలు ఏర్పాటు చేస్తున్నప్పటికీ అధికారులు, పోలీసులు పట్టించుకోకపోవడం విడ్డూరంగా ఉందన్నారు. కొత్తవీధిలో విగ్ర హం ఏర్పాటులో వివాదముందని తెలిసికూడా ఎమ్మెల్యే ముత్యాలపాప ఆవిష్కరణ సభకు రావడం దురదృష్టకరమన్నారు. గ్రామాభివృద్ధికి సర్పంచ్ ఏంచేశారని ఎమ్మెల్యే ప్రశ్నించడం విడ్డూరంగా ఉందన్నారు. కొత్తవీధిలో రామాలయం, పాఠశాల భవనం, వీధి కుళాయిలు, సిమెంట్ రోడ్లు, శ్మశాన వాటిక ఏర్పాటు వంటి అభివృద్ధి పనులు చేశామన్నారు. పట్టణంలో పంచాయతీ అనుమతి లేకుండా ఏర్పాటుచేసిన విగ్రహాలపై పోలీసులకు ఫిర్యాదు చేస్తామని చెప్పారు. ఈ కార్యక్రమంలో ఉపసర్పంచ్ రావాడ నాయుడు, ఎంపీటీసీ సభ్యుడు మాకిరెడ్డి అప్పారావు, తెలుగుదేశం టౌన్ కార్యదర్శి కామిరెడ్డి రామారావు పాల్గొన్నారు.