అంకిత భావంతో పనిచేయాలి

బుచ్చెయ్యపేట, నవంబర్ 21(చైతన్యవారధి) : వైద్య సిబ్బంది అంకిత భావంతో పని చేయాలని జిల్లా వైద్య ఆరోగ్యశాఖాధికారి జి. సావిత్రి తెలిపారు. బుచ్చెయ్యపేట, తురకలపూడి పీహెచ్‌సీలను పరిశీలించారు. రికార్డులను తనిఖీ చేశారు. పి.పి.అగ్రహారం వెళ్లి ఆస్పత్రిలో ఇటీవల పురుడుపోసుకున్న నంది లక్ష్మికి జననీ సురక్ష పథకంలో ఆర్థిక సాయం అందజేసిందీ లేనిదీ విచారించారు. ఈ సందర్భంగా విలేకరులతో ఆమె మాట్లాడుతూ జిల్లాలోని అన్ని పీహెచ్‌సీలలో డయేరియా, మలేరియా రోగులకు అవసరమైన మందులు అందుబాటులో ఉన్నాయన్నారు. తాగునీటి క్లోరినేషన్‌తో వ్యాధులను దూరం చేయవచ్చన్నారు. ఒక్కో క్లోరినేషన్ మాత్ర 20 లీటర్ల నీటిలో కలపాలని సూచించారు. జిల్లాలో 32 వైద్యాధికారుల పోస్టులు ఖాళీగా ఉన్నాయని, వీటి భర్తీకి చర్యలు చేపడుతున్నామని తెలిపారు. డిసెంబరు ఒకటి నుంచి విద్యార్ధులకు హెల్త్ కార్డుల అందజేస్తామన్నారు. ప్రజలకు మెరుగైనసేవలు అందించాలనివైద్య సిబ్బందికి సూచించారు.