పరీక్షల వాయిదాతో భగ్గుమన్న సీమాంధ్ర

చైతన్యవారధి: తెలంగాణ విద్యార్థుల ఆందోళనలకు తలొగ్గి ఎస్సై రాత పరీక్షల్ని వాయిదావేస్తున్నట్లు రాష్ట్ర ప్రభుత్వం శుక్రవారం మధ్యాహ్నంప్రకటించింది. పరీక్షల నిర్వహణకు అనువైన వాతావరణం లేనందున రాష్ట్రవ్యాప్తంగా వాయిదావేస్తున్నట్లు హోంమంత్రి సబిత ప్రకటించారు. దీంతో నాలుగైదు రోజులుగా అట్టుడుకుతున్న తెలంగాణ ప్రాంతం శాంతించింది.  అయితే ప్రభుత్వ ప్రకటన వెలువడిన మరుక్షణం సీమాంధ్ర ప్రాంతం భగ్గుమంది. ప్రభుత్వ నిర్ణయాన్ని నిరసిస్తూ సీమాంధ్రలోని వివిధ విశ్వవిద్యాలయాల విద్యార్థులు పెద్దఎత్తున ఆందోళనకు దిగారు. రాస్తారోకోలు, ర్యాలీలు, ధర్నాలు, దిష్టిబొమ్మల దహనాలు, ఆత్మహత్యా యత్నాలతో శుక్రవారం మధ్యాహ్నం నుంచి వివిధ నగరాలు, పట్టణాలు హోరెత్తాయి. ముఖ్యమంత్రి రోశయ్య, హోంమంత్రి సబితా ఇంద్రారెడ్డి తక్షణం తమ పదవులకు రాజీనామా చేయాలని విద్యార్థులు డిమాండుచేశారు. తెలంగాణ హోంమంత్రిని అడ్డుకోలేని సీమాంధ్ర మంత్రులు కూడా తమ పదవుల్ని వదులుకోవాలంటూ గళమెత్తారు. ప్రభుత్వం తన నిర్ణయాన్ని వెనక్కి తీసుకుని, పరీక్షల్ని యథాతథంగా నిర్వహించకపోతే మంత్రుల ఇళ్లను ముట్టడిస్తామని హెచ్చరించారు. ప్రభుత్వ నిర్ణయానికి నిరసనగా శనివారం సీమాంధ్రలోని అన్ని విద్యాసంస్థల బంద్‌కు సమైక్యాంధ్ర విద్యార్థి ఐకాసలు పిలుపునిచ్చాయి. 14 విశ్వవిద్యాలయాల పరిధిలో బంద్‌ పాటిస్తామని ప్రకటించాయి. ప్రభుత్వం గతంలో ప్రకటించిన తేదీల్లోనే ఎస్సై రాత పరీక్షలు నిర్వహించాలని డిమాండుచేస్తూ ఆంధ్ర విశ్వవిద్యాలయంలో శుక్రవారం రాత్రి ఇద్దరు నాయకులు ఆమరణ దీక్షకు దిగారు. సమైక్యాంధ్ర విద్యార్థి ఐకాస ఏయూ కన్వీనర్‌ లగుడు గోవిందరావు, సమైక్యాంధ్ర పరిరక్షణ సమితి కన్వీనర్‌ కాంతారావులు రాత్రి 10 గంటల సమయంలో దీక్షకు పూనుకున్నారు. మొత్తంమీద నిన్నామొన్నటి దాకా తెలంగాణలో కనిపించిన ఉద్రిక్త పరిస్థితులు ఇప్పుడు సీమాంధ్రలోతలెత్తాయి.