అందమైన పెదవులు కోసం...

ఆరోగ్యవారధి: పెదవులు అందంగా ఉండాలని ఎవరికి మాత్రం ఉండదు చెప్పండి..!!కానీ ఈ రోజుల్లో భోజనం లో వచ్చిన మార్పులు, నిద్రలేమి, ఎక్కువ గాఢత కలిగిన పేస్ట్లు, రక్తహీనత వల్ల పెదవులు పాడవుతున్నాయి.పెదవులు తోలు ఊడిపోయి, చివరలు పగిలి, నల్లగా కళావిహీనంగా తయారవుతున్నాయి. అందమైన ముఖానికి కళ్లు, చెక్కిళ్లు ఎంత అవసరమో అధరాలు కూడా అంతే అవసరం. ఆ అధరాలను అందంగా ఉంచుకోవడానికి ఎన్నో చిట్కాలు ఉన్నాయి. అన్నీ పాటించలేక పోయినా ఇంట్లో చేయగలిగినవి కొన్ని పాటించి మన అందాన్ని కాపాడుకోవచ్చు. ప్రతి రోజు వెన్న, మీగడ, నెయ్యిలాంటివి రాస్తుంటే పెదవులు నిగనిగలాడుతుంటాయి. పెదవులు నల్లగా ఉంటే కాస్త మీగడలో నిమ్మరసం పిండి రాసుకుని పదినిమిషాలు అయ్యాక కడిగేయాలి. ఇలా క్రమం తప్పకుండా చేస్తే నలుపు తగ్గిపోతుంది. రాత్రి పడుకునేటప్పుడు పెదవులకు గులాబి రసాన్ని రాసుకుని పడుకుంటే పెదవులు నిగారింపు సంతరించుకుంటాయి.
గులాబి రేకుల్ని పాలతో నూరి రాసుకోవాలి.బొటన వేలితో పెదవుల చుట్టూ నొక్కుతూ మసాజ్ చేయడం వలన పెదవులుపై పగుళ్లు ఏర్పడవు. పచ్చి కొత్తిమీర రసం పెదవులకు రాసుకుని పడుకుంటే పెదవులు అందంగా ఉంటాయి. పెదవులను పదే పదే తడప కూడదు. కోల్డ్ క్రీమ్స్ కూడా ఉపయోగించవచ్చు.పెదవులు ఎర్రగా కాకుండా, నల్లగా కాకుండా ఉన్నాయంటే పగడపు రంగు లిప్‌స్టిక్ ఉపయోగించడం మంచిది. లిప్‌స్టిక్ ఉపయోగించే వారు రాత్రి పడుకునే ముందు తొలగించుకోవాలి. పెదవులు నల్లగా ఎండిపోయినట్లు ఉండేవారు.. వీలైనంత తక్కువగా లిప్‌స్టిక్ వాడితే సరిపోతుంది. ఇకపోతే... పెదవుల సౌందర్యాన్ని కాపాడుకోవాలంటే... తక్కువ ధరలకు లభించే, చవకబారు లిప్‌స్టిక్‌లను అసలు వాడక పోవడం మంచిది.