మహిషాసురమర్ధినిగా బెజవాడ కనకదుర్గ

విజయవాడ: దసరా శరన్నవరాత్రి మహోత్సవాల్లో ఆశ్వయుజశుద్ధ నవమినాడు అమ్మవారిని శ్రీ మహిషాసురమర్ధినీదేవిగా అలంకరిస్తారు. శరన్నవరాత్రుల్లో ఆఖరిరోజు నవమి. దీన్నే మహార్నవమి అని కూడా అంటారు. చండీ సప్తశతిలో మహాలక్ష్మీ రూపిణి అయిన దుర్గాదేవి అష్టభుజాలతో దుష్టరాక్షసుడైన మహిషాసురుణ్ణి చంపి లోకాలన్నిటికీ మేలుచేసింది. ఆ తల్లి నవమి రోజున ఈ రాక్షసుణ్ణి సంహరించింది కనుక దీన్ని మహార్నవమి అంటారు. మహిషాసురుడి వల్ల తీవ్ర కష్టాలు పడుతున్న ఇంద్రాది దేవతలంతా తమ తమ శరీరాల్లోంచి దివ్య తేజస్సుల్ని బైటికి ప్రసరింపచేస్తారు. ఆ తేజస్సులన్నీ కలిసిపోయి ఒక దివ్య తేజోమూర్తి పుట్టింది. ఆమెకు దేవతలంతా తమ తమ ఆయుధాల్ని సమర్పించారు. హిమవంతుడు తన వంతుగా ఒక సింహాన్ని ఆ తల్లికి వాహనంగా ఇచ్చాడు. అలా సింహవాహినిగా రూపొందిన ఆ శక్తి వికటాట్టహాసం చేసి, మహిషాసురుడి సేనాపతులైన రాక్షసులందరినీ సంహరించింది. ఆ తరువాత యుద్ధంలో దేవి అవలీలగా మహిషాసురుణ్ణి చంపి, అదే స్వరూపంతో ఇంద్రకీలాద్రి మీద వెలిసింది. కాలక్రమంలో భక్తులకు కొంగు బంగారంగా నిలిచే కనకదుర్గగా కీర్తిపొందింది. ఈ మహిషాసురమర్ధినీదేవి శరన్నవరాత్రి అలంకారాల్లో సింహవాహనం మీద ఆలీఢ పాద పద్ధతిలో ఒకచేత త్రిశూలాన్ని ధరించి, మహిషాసురుణ్ణి సంహరిస్తున్న రూపంతో దర్శనమిస్తుంది. తలచినంతనే సమస్త భయాల్ని పోగొట్టి ధైర్యాన్నీ, స్త్థెర్యాన్ని ఆమె ప్రసాదిస్తుంది.