వైభవంగా ఉపమాక ఉత్సవాలు

నక్కపల్లి, చైతన్యవారధి: ఉపమాకలో వెలసిన వెంకటేశ్వరస్వామి బ్రహ్మోత్సవాలు ఘనంగా జరుగుతున్నాయి. శుక్రవారం రాత్రి అంకురార్పణతో ప్రారంభమైన ఈ కార్యక్రమాల్లో తొలిరోజైన శనివారం నుంచి స్వామివారి తిరువీధి సేవలు ప్రారంభమయ్యాయి. శనివారం ఉదయం స్వామివారి ఉత్సవమూర్తులకు నిత్యారాధన, కొండపై మూలవిరాట్టుకు అభిషేకం, శేష హోమాలు నిర్వహించారు. అనంతరం స్వామివారి ఆలయంలో అష్టదిక్పాలకులకు గరుడగజ్జెలతో ప్రత్యేక ఆవాహన కార్యక్రమం జరిగింది. అనంతరం శ్రీదేవి, భూదేవి సమేతుడైన శ్రీనివాసుడిని పల్లకిలో ఉంచి ఉపమాక మాఢవీధుల్లో తిరువీధి సేవ నిర్వహించారు. భక్తులు స్వామివారికి పసుపు కుంకుమలు సమర్పించుకున్నారు. బ్రహ్మోత్సవాల్లో భాగంగా గ్రామంలో అష్టదిక్పాలకులకు ఆవాహన, బలిహరణ, ధ్వజారోహణ కార్యక్రమాలు జరిగాయి. ఆపై స్వామివారికి నీరాజన మంత్రపుష్ప కార్యక్రమం నిర్వహించారు. స్వామిని ఆలయంలో ఉంచి రాజభోగ నివేదన, తీర్థగోష్ఠి, ప్రసాదవినియోగం చేశారు. దీంతో ఉదయం కార్యక్రమాలు పూర్తయ్యాయి. సాయంత్రం ధ్వజారోహణ మినహా మిగతా కార్యక్రమాలు నిర్వహించి స్వామివారిని పల్లకీలో ఊరేగించారు. ఆలయ పాలకమండలి చైర్మన్ చిలువూరి రామసూర్యనారాయణరాజు (పెంకులరాజు) కార్యక్రమంలో పాల్గొన్నారు.